投胎做香港人，
你幾多歲上到車？
一撳就投胎，出世年份、地區同家境都係隨機。之後人生自己行，大約一秒一年，最長行到 120 歲。你可以隨時轉人生重點：打波定打機、溫書定搏升職，會影響健康、快樂、知識同人際。升學、上車、結婚呢啲大事會停低等你揀；機率跟官方數據同研究。
人生收據
阿爸嗰代幾多歲
儲夠首期？你呢？
同樣每年儲錢，兩代人要儲到幾多歲，先夠錢俾一層 484 呎樓嘅三成首期。用差估署樓價同統計處住戶入息中位數計。
人生模擬點樣計
- 1985 至 2025 年用真實數字：樓價、租金、人工、失業率、按揭利率、恒指同 Bitcoin。2026 年之後係推算：每年隨機抽返 1988–2025 年其中一年嘅升跌，樓價同租金會慢慢拉返去長期平均水平，再加虛構嘅打仗、疫症、AI 突破、天災同新藥。
- 樓價同租金：差估署 B 類私人住宅（實用面積 40–69.9 平方米）平均呎價同呎租，乘 45 平方米（約 484 呎）。分區價係推算：用 2021 年人口普查各區私樓租金中位數同按揭供款中位數，對比所屬港島、九龍或新界嘅平均，計出該區貴定平幾多。唔係官方分區樓價。
- 四條數值：健康、快樂、知識同人際，由 0 到 100。人生重點每年加減，例如細個打波健康 +3、快樂 +2、人際 +2，做嘢搏升職健康 −2、快樂 −2、人際 −1；大事都會加減，例如結婚快樂 +8、失業快樂 −8、大病健康 −20。知識讀書嗰陣每年 +3，做嘢每年 +0.5，70 歲之後慢慢跌；健康每年拉返同齡平均一成，快樂同人際慢慢拉返你自己嘅基本水平。呢啲數全部係遊戲設定。
- 數值點樣影響人生，用研究數字封頂：健康比同齡平均低 30 分，每年死亡率 ×1.3，高 30 分 ×0.85（世界衞生組織：缺乏運動嘅人死亡風險高 20–30%）；人際 0 分死亡率 ×1.15，100 分 ×0.87（Holt-Lunstad 等 2010 年綜合 148 個研究、約 31 萬人：社交關係強嘅人存活機會高五成）。健康亦影響患大病嘅機會；人際影響結婚機會同失業幾耐；知識影響考試、升職、失業同 AI 衝擊（假設）。快樂只係記錄，唔影響其他嘢。
- 升學：1978 年起有九年免費教育，2008/09 學年起高中都免費。中三之後你揀升中四、讀職業訓練定出嚟做嘢；1994 年或之前出世嘅 17 歲考會考，之後出世嘅 18 歲考 DSE。考到大學、副學士或高級文憑嘅機會，用 2021 年人口普查同年紀嘅人實際讀到邊個程度（主要表 B108b），再按知識調整：知識比平均高 25 分，五成機會變七成三（假設）。讀書嗰幾年唔計學費同生活費。做嘢之後揀「進修」，讀夠四年升一級（假設）。
- 人工：統計處按年齡劃分嘅每月就業收入中位數（1993 年起不包括外傭；之前包括），乘教育程度系數：統計處按教育程度劃分嘅收入中位數除整體中位數，用當年數字，2026 年後用 2025 年；啱出嚟做嘢只計四成差距，做咗 18 年先計足。讀職訓當高中程度計；職業按教育程度隨機抽（假設）。每年有 7% 機會升職加一成二，知識高、搏升職機會大啲（假設）。
- 失業：每年失業機會＝當年失業率 × 1.5，失業 2–6 個月；知識高少啲失業，人際好搵工快啲（假設）。
- 結婚：統計處首次結婚人數除同齡人口，計出每個年齡每年結婚嘅機會，再按人際調整：0 分減半，100 分多五成（假設）。另一半年紀相差三歲以內，教育程度按佢嗰屆嘅普查比例抽。擺酒當用四個月家庭收入（扣埋人情），註冊用 0.3 個月（假設）。
- 生仔：你決定；之後一年內有 BB 嘅機會，35 歲前 85%、40 歲前 60%、之後 35%（假設）。每個仔女每年用家庭收入嘅 12%，養到 22 歲；工人姐姐每月當工資中位數嘅 28%，請到最細個 12 歲（假設）。
- 病：癌症資料統計中心：大約每 4 個男人、每 5 個女人就有一個 75 歲前患癌。按年齡遞增計機會（假設嘅年齡曲線），再乘健康系數。公立停工 6 個月；私家停工 3 個月，醫藥費當 8 個月人工（假設）。
- 寵物同身體檢查：搬出嚟住之後有機會問你養唔養寵物，狗每年用工資中位數 0.7 個月、貓 0.45 個月，狗陪你 10–13 年、貓 12–16 年（假設）。40、50、60 歲會問你做唔做每年身體檢查，每年用工資中位數四分一個月；大病對健康嘅打擊減半，但唔會直接加壽命，因為 Cochrane 2019 年綜合研究發現一般身體檢查對死亡率冇明顯影響。
- 壽命：統計處香港生命表，男女平均，年份之間按比例計；2026 年後用 2025 年生命表，死亡率每年再跌 1%（假設），最長 120 歲。再乘健康同人際系數（見上）。
- 錢：住屋企俾人工 15% 家用；仔女出嚟做嘢之後，每人每月俾你工資中位數嘅一成（假設）。扣咗住屋、仔女同工人開支之後，慳家嘅人用剩低嘅 35%、普通 50%、月光族 75%，但每個大人最少用工資中位數嘅四分一；退休後用返做嘢時平均嘅六成（假設）。旅行每次用 0.6 個月家庭收入（假設）。現金唔計利息，唔計稅。1985 年前出嚟做嘢嘅年份冇人工數據，1985 年當你每做一年儲咗 1.2 個月人工（假設）。
- 老年：65 歲後如果現金少過資產上限，有長者生活津貼；70 歲後有高齡津貼（社會福利署 2024 年 2 月金額同資產上限，按工資中位數調整）。有樓但冇錢，2011 年後可以做安老按揭；唔夠先賣樓。
- 家境：按 2021 年人口普查各類房屋住戶比例抽。父母有私樓，六成機會幫你首期（三成首期嘅 30%–100%）；住居屋，三成機會幫 20%–50%（假設）。父母都過身之後，屋企層樓按兄弟姊妹平分；獨生又未有樓就直接承繼（假設）。
- 上車：三成首期加 3% 雜費（印花稅、佣金、律師費，簡化）。1991 年前銀行做到九成按揭，之後跟金管局七成上限；1999 年起有按揭保險，可以借八成半，2000 年起九成。月供唔可以超過家庭收入一半。按揭 25 年，息率跟滙豐最優惠利率：2000 年前當同最優惠利率一樣，2001–2008 年減 2.5 厘，2009–2022 年減 2.75 厘，2023 年起減 1.75 厘（簡化）。
- 強積金：2001 年起，僱主僱員各供 5%（有上限），每年回報 4%（假設），65 歲退休拎晒。
- 炒股跟恒指年底收市，炒幣跟 Bitcoin 年底價，一年後揭盅；推算年份隨機抽返歷史升跌。
- 冇計：公屋、居屋、換樓、離婚、稅、學費。全部係平均數，唔係你屋企嘅實際情況。
兩代收據點樣計
- 收入：統計處住戶每月入息中位數（表 130-06606），乘 12 當全年收入。樓價÷年收入，即係一個中位數收入家庭唔食唔用幾多年先買到。
- 儲夠三成首期嘅年數＝0.3 × 樓價÷年收入 ÷ 每年儲起嘅比例。兩代人都假設 25 歲開始儲，儲錢期間樓價同收入比例不變，唔計利息同投資回報；阿爸嗰代假設阿爸 30 歲生你。
- 1999 年之前差估署將九龍分為九龍同新九龍，呢度用兩區平均；新界 1987 年之前嘅數字有註記，所以兩代收據嘅新界由 1987 年開始（人生模擬用全港 B 類售價指數推算 1985–86 年）。
資料來源
- 差餉物業估價署「私人住宅－各類單位平均售價」「平均租金」及「售價指數」（DATA.GOV.HK），1985–2025 年。
- 政府統計處：表 130-06606 住戶每月入息中位數；表 210-06314 及 210-06314A 按年齡劃分的每月就業收入中位數；表 210-06317A 及 210-06307A 按職業劃分的收入同人數；表 210-06101 失業率；表 510-60001 綜合消費物價指數；表 115-01011 出生人數；表 115-01013 首次結婚人數；表 110-01001A 年中人口；表 115-01021 香港生命表；表 110-02001 各區人口。
- 2021 年人口普查主要表 E103、E102、E201c、E206（各類房屋住戶、按揭供款同私樓租金中位數）。
- 政府統計處：表 210-06315 及 210-06315A 按教育程度劃分的每月就業收入中位數；2021 年人口普查主要表 B108b（按年齡及教育程度劃分的人口）。九年免費教育（1978 年）同十二年免費教育（2008/09 學年）：教育局。
- 世界衞生組織〈Physical activity〉資料頁。Holt-Lunstad J, Smith TB, Layton JB. Social relationships and mortality risk: a meta-analytic review. PLoS Medicine, 2010。Krogsbøll LT, Jørgensen KJ, Gøtzsche PC. General health checks in adults for reducing morbidity and mortality from disease. Cochrane Database of Systematic Reviews, 2019。
- 香港金融管理局：港元利率，滙豐最優惠利率（1971–2025 年）。
- 香港癌症資料統計中心《2023 年香港癌症統計數字概覽》。
- 恒生指數年底收市：Wikipedia「Hang Seng Index」年度表。Bitcoin 年底價：Blockchain.com「Market Price (USD)」。
- 2003 年 6 月底約 10.6 萬宗負資產按揭：香港金融管理局 2003 年 8 月 14 日新聞稿。1991 年前最高九成按揭、之後七成上限：金管局〈Evolution of 70% loan-to-value policy〉（2009）。按揭保險 1999 年 3 月推出、2000 年擴展至九成按揭：《香港年報 2001》。長者生活津貼同高齡津貼金額：社會福利署（2024 年 2 月）。